約基利斯首次獲得瑞典足球先生殊榮。(Getty Images)

來到年尾，世界各地球壇陸續舉行頒獎禮，今季人氣急升嘅士砵亭前鋒約基利斯以大熱姿態，當選今年瑞典足球先生。

約基利斯今年為士砵亭及瑞典國家隊各項賽事，總共上陣60場射入61球，成為史上第8位單年入波「60+」球員，同7位神鋒C朗、美斯、羅拔利雲度夫斯基、比利、薛高、羅馬里奧、梅拿睇齊，力壓熱刺中場古路施夫斯基、紐卡素前鋒阿歷山大伊沙克，首次獲得瑞典足球先生殊榮，絕對實至名歸。

呢位26歲射手攞獎後話：「非常榮幸獲得呢個獎，雖然我並非踢英超，但亦盡力做到最好，並已經喺歐聯證明自己嘅能力。」約基利斯今屆歐聯已有5球進帳。

估計約基利斯現時身價達1億歐元(約8.2億港元)，曼聯、阿仙奴、車路士等豪門都有意簽佢，特別係曼聯聘請前士砵亭教練魯賓艾摩廉領軍後，可以利用佢同約基利斯嘅關係，遊說呢位猛將加盟。